Minikekë me boronica

Përbërësit:

  • 210 gr miell
  • 150 gr sheqer
  • 120 ml qumësht
  • 80 ml vaj misri
  • 1 vezë
  • 200 gr boronica
  • 2 lugë çaji pluhur fryrës për ëmbëlsira
  • Lëkura e grirë e një limoni
  • ½ lugë çaji kripë
  • 1 lugë çaji ekstrakt vanilje
  • 1 lugë çaji uthull e bardhë

Përgatitja:

1. Në një enë mesatare shtoni qumështin dhe uthullën dhe lëreni mënjanë për disa minuta.

2. Merrni një enë të thellë dhe shtoni miellin, sheqerin, pluhurin fryrës dhe kripën. Trazojini mirë me lugë druri. Shtoni boronicat dhe trazoni sërish.

3. Shtoni qumështin, vajin, vaniljen, lëkurën e limonit. Në një enë të vogël rrihni vezën me pirun dhe shtojeni vezën e rrahur në enë.

4. Trazoni përbërësit derisa të kombinohen plotësisht. Mos trazoni më shumë se ç’është e nevojshme.

5. Lëreni brumin mënjanë për 10 minuta. Ndërkohe ndizni furrën në 220oC dhe bëni gati një tavë 12 vendëshe për minikekë duke vendosur letrën për minikekë në çdo gropë ose duke i lyer gropat me gjalp.

6. Shtoni brumin me lugë në çdo gropë të tavës. Piqini për 20 minuta, në 220oC në 10 minutat e para dhe më pas uleni temperaturën në 180oC për 10 minutat e mbetura.

.

Toptha energjie me hurma arabie

Përbërësit:

  • 400 gr hurma arabie pa bërthamë
  • 250 gr arra
  • 50 gr arrë kokosi e grirë
  • 1 lugë çaji ekstrakt vanilje
  • 1 majë gishtash kripë

Përgatitja:

1. Në një enë mesatare shtoni hurmat e arabisë dhe mbulojini me ujë të ngrohtë. Lërini rreth 10 minuta derisa të zbuten dhe të fryhen paksa.

2. Shtoni arrat, hurmat, vaniljen dhe kripën në blender dhe pulsojini derisa të formohet një masë e njëtrajtshme dhe  e punueshme.

3. Lëreni brumin e përgatitur për rreth 30 minuta në frigorifer.

4. Ndajeni brumin në toptha dhe rrotullojini me duar. Në një enë derdhni arrën e kokosit dhe kalojini topat një nga një në enë duke i rrotulluar që të vishen nga të gjitha anët me arrë kokosi.

.

Brigadeiro

Përbërësit:

  • 390 ml qumësht i kondensuar i ëmbël
  • 25 gr kakao pa sheqer
  • 20 gr gjalp
  • Grimca çokollate

Përgatitja:

1. Në një tenxhere mesatare shkrini gjalpin në zjarr të ulët. Kur gjalpi të ketë shkrirë, shtoni qumështin e kondensuar dhe kakaon e situr.

2. Trazoni pa ndërpreje me tel kuzhine për rreth 10 minuta derisa masa të trashet, të bëhet kremoze dhe e lëmuar.

3. Hiqeni nga zjarri dhe kalojeni në një enë të lyer me gjalp. Mbulojeni me letër plastike dhe lëreni të ftohet në frigorifer për rreth 2 orë.

4. Kur të jetë ftohur, ndajeni brumin në toptha 20 gr secili. Lyejini duart me gjalp dhe rrotullojini topat për t’iu dhënë formë perfekte. Rrotullojini në grimcat e çokollatës.

.

Kek me limon dhe fara lulëkuqeje

Përbërësit:

  • 230 gr miell
  • 200 gr sheqer
  • 3 vezë të mëdha
  • 100 gr gjalp (i zbutur, gati i shkrirë)
  • 50 ml qumësht
  • 120 ml salcë kosi
  • 30 ml lëng limoni
  • Lëkura e grirë e 2 limonave
  • 1 + ½ lugë gjelle fara lulëkuqeje
  • 1 lugë çaji ekstrakt vanilje
  • 2 lugë çaji pluhur pjekjeje
  • ¼ lugë çaji sodë buke
  • ¼ lugë çaji kripë
Për glazurën:
  • 100 gr sheqer pluhur
  • 3-4 lugë gjelle lëng limoni

Përgatitja:

1. Ngrohni furrën në 180oC dhe shtroni me letër pjekjeje një tavë katrore 20×20 cm.

2. Në një enë të thellë sitni miellin, sodën, pluhurin e pjekjes, kripën, sheqerin. Trazojini mirë dhe lëreni enën mënjanë.

3. Merrni një enë tjetër dhe shtoni salcën e kosit, gjalpin e zbutur, lëngun e limonit, lëkurën e limonit, vaniljen, qumështin dhe në fund vezët. Trazojini mirë me tel kuzhine derisa të formohet një masë e njëtrajtshme.

4. Shtoni masën e përgatitur në enën e miellit dhe kombinojini mirë derisa t’ju formohet një brum homogjen.

5. Derdheni brumin në tavë dhe piqeni për rreth 40-45 minuta derisa kunji të dalë i pastër nga qendra e kekut.

6. Ndërkohë që keku piqet përgatisni glazurën. Shtoni në një enë mesatare sheqerin pluhur dhe shtoni nga pak lëng limoni ndërkohë që trazoni me spatul derisa të arrini në trashësinë e dëshiruar.

7. Lëreni kekun të ftohet dhe derdhini sipër glazurën e përgatitur.

Kek me banane (Banana bread)

Përbërësit:

  • 230 gr miell
  • 100 gr sheqer kaf
  • 50 gr sheqer i bardhë
  • 2 vezë të mëdha
  • 3 banane shumë të pjekura (mesatare)
  • 75 gr gjalp
  • 38 ml vaj
  • 60 gr arra të copëtuara
  • 70 gr rrush i thatë
  • 1 lugë çaji sodë buke
  • 1 lugë çaji ekstrakt vanilje
  • ½ lugë çaji kanellë
  • ½ lugë çaji kripë
  • 1 banane (për dekor)

Përgatitja:

1. Ndizni furrën në 180oC. Në një enë të thellë sitni miellin dhe shtoni kripën, kanellën dhe sodën. Miksojini me lugë dhe lëreni enën mënjanë.

2. Në një enë tjetër shtoni gjalpin (i zbutur, temperaturë dhome), sheqerin kaf dhe sheqerin kaf dhe miksojini me mikser dore derisa t’ju formohet një masë homogjene. Shtoni vaniljen dhe vezët dhe vazhdoni të miksoni derisa masa të njëtrajtësohet.

3. Në një enë mesatare shtypni bananet me pirun derisa të bëhen si pure dhe shtojini në enën ku po miksonit. Miksojeni dhe purenë me mikser dore, shtoni masën e enës ku keni miellin dhe miksoni sërish.

4. Shtoni arrat e copëtuara  dhe rrushin e thatë dhe përziejeni brumin e kekut me spatul.

5. Merrni një tavë drejtkëndore keku dhe shtrojeni me letër pjekjeje ose lyejeni me gjalp. Derdhni në të brumin dhe nivelojeni me spatul.

6. Merrni një banane dhe ndajeni përgjysëm në dy feta dhe vendosini mbi brum për dekor. Spërkatini me pak sheqer kaf sipas dëshirës.

7. Piqeni kekun për rreth 1 orë dhe testojeni me një kunj në qoftë se është pjekur sic duhet. Lëreni të ftohet tërësisht para se ta konsumoni.

Petulla të mbushura me krem vanilje

Përbërësit:

  • 300 gr miell
  • 140 ml qumësht
  • 30 gr sheqer
  • 1 vezë + 1 i kuq veze
  • 20 gr gjalp
  • 6 gr maja buke
  • ½ lugë çaji kripë
  • Lëkura e grirë e një portokalli
  • Vaj për skuqje
  • Sheqer + 1 lugë gjelle kanellë (për të mbuluar petullat)
Për kremin e vaniljes:
  • 5 të kuq veze
  • 100 gr sheqer
  • 500 ml qumësht
  • 25 gr niseshte
  • 20 gr miell
  • 1 shkop vanilje (ose 2 lugë çaji ekstrakt i lëngët vanilje)

Përgatitja:

1. Në një enë të thellë shtoni qumështin e vakët, majanë dhe sheqerin. Trazojini lehtë dhe lëreni mënjanë në një ambient të ngrohtë për disa minuta derisa majaja të ketë formuar flluska në sipërfaqe.

2. Shtoni në enë kripën, vezën, të kuqin e vezës, lëkurën e portokallit, gjalpin dhe miellin. Trazojini mirë derisa t’ju formohet brumi. Ngjesheni brumin në një sipërfaqe të spërkatur me pak miell për disa minuta. Brumi duhet të jetë pak ngjitës, në qoftë se është shumë ngjitës shtoni nga pak miell ndërkohë që e punoni me duar.

3. Jepini brumit formë topi dhe kalojeni në një enë të lyer me pak vaj. Mbulojeni mirë me letër plastike dhe lëreni të vijë në një ambient të ngrohtë për rreth 1-1.5 orë derisa të jetë dyfishuar në madhësi.

4. Ndërkohë që brumi pushon, përgatisni kremin e vaniljes. Në një enë të thellë shtoni të kuqtë e vezëve dhe sheqerin dhe rrihini me tel kuzhine derisa masa të marri ngjyrë të çelët. Shtoni niseshten dhe miellin, trazojini mirë dhe lëreni enën mënjanë.

5. Vini në zjarr qumështin dhe vaniljen dhe lërini deri në prag zierjeje. Kullojeni qumështin e nxehtë në enën me masën e vezëve dhe trazoni mirë me tel.

6. Kalojeni gjithë masën sërish ne tenxhere dhe në zjarr të ulët trazojeni vazhdimisht derisa masa të trashet dhe të lëmohet, duke u bërë kremoze si puding.

7. Derdheni në një enë kremin dhe mbulojeni me letër plastike sipërfaqen e kremit. Kur të jetë ftohur mjaftueshëm, lërini në frigorifer derisa të përfundoni përgatitjen e petullave.

8. Merrni brumin e ardhur të petullave dhe ndajeni në 12 pjesë të barabarta (rreth 46 gr secila). Jepini çdo pjese formë topi dhe vërini në një tavë të shtruar me letër kuzhine, duke lënë distancë nga çdo top. Mbulojeni me pecetë kuzhine tavën dhe lërini të vijnë për rreth 30 minuta.

9. Në një enë mesatare shtoni sheqer dhe kanellë dhe trazojini mirë, që ta keni gati për të veshur petullat.

10. Vendosni një tenxhere të thellë në zjarr dhe mbusheni përgjysëm me vaj skuqjeje. Kur vaji të jetë i nxehtë, skuqni petullat derisa të marrin ngjyrë të kafenjtë. Kullojini në letra thithëse dhe sa janë ende të nxehta rrotullojini në enën me sheqer dhe kanellë.

11. Kur të keni përfunduar skuqjen e petullave, kalojeni kremin e vaniljes në një qese kremi. Shponi një vrimë në anë të çdo petulle dhe aty mbushini me kremin e përgatitur.

12. Petullat mund t’i mbushni dhe me reçel ose nutella sipas dëshirës.

Patate të ëmbla të mbushura

Përbërësit:

  • 4 patate të ëmbla mesatare
  • 350 gr qiqra të ziera
  • 2 lugë gjelle vaj ulliri i virgjër
  • kripë
  • Për kremin e qiqrave (hummus):
  • 250 gr qiqra të ziera
  • 130 gr krem susami (tahini)
  • 60 ml lëng limoni
  • 1 thelbi hudhër
  • 1 lugë gjelle vaj ulliri i virgjër
  • 2-3 lugë  ujë  i ftohtë
  • ½ lugë  çaji kripë

Përgatitja:

1. Për të përgatitur kremin e qiqrave, vini për të zierë rreth 20 minuta qiqrat e ziera, pasi duhet të jenë të mbiziera dhe të buta.

2. Në një blender shtoni lëngun e limonit, kripën dhe thelpinë e hudhrës pasi ta keni grirë imët. Miksojini në blender për 1 minutë dhe lëreni të pushojë disa minuta që hudhra të lëshojë aromën e saj.

3. Shtoni kremin e susamit dhe miksoni në blender derisa të formohet një masë kremoze e lëmuar me ngjyrë të çelët. Shtoni një lugë ujë të ftohtë dhe miksoni sërish.

4. Shtoni qiqrat dhe vajin e ullirit në blender dhe miksoni disa minuta derisa masa të jetë bërë totalisht kremoze, shtoni1-2 lugë ujë nqs kremi është shumë i trashë.

5. Lërëni mënjanë kremin e qiqrave dhe merrni patatet e ëmbla. Pasi i keni larë dhe fshirë mirë, shpojini me pirun dhe vendosini në një tavë të shtruar me letër pjekjeje. Piqini për rreth një orë në 220oC dhe testojini me pirun në qoftë se janë pjekur plotësisht.

6. Lërini patatet e pjekura të ftohen pak dhe merrni një tavë tjetër të shtruar me letër pjekjeje. Shtroni qiqrat e ziera (thajini me letër kuzhine paraprakisht, nuk duhet të jenë të lagura) në tavë, spërkatini me vajin e ullirit  dhe kripën, trazojini dhe piqini në furrë për 15-20 minuta.

7. Ndajini përgjysëm patatet dhe mbushini me kremin e qiqrave dhe qiqrat e pjekura. Spërkatini sipas dëshirës me erëzat e preferuara ose shoqërojini me avokado.

Granola Bars

Përbërësit:

  • 180 gr tërshërë kokërrplotë
  • 40 gr quinoa në formë drithi (ose tërshërë)
  • 180 gr mjaltë
  • 50 gr gjalp (ose vaj kokosi bio)
  • 70 gr bajame
  • 90 gr rrush i thatë
  • 60 gr boronicë e kuqe e thatë
  • 20 gr fara luledielli të qëruara

Përgatitja:

1. Në një tavë të shtruar me letër pjekje shtroni tërshërën, quinoan, bajamet e prera në copa dhe farat e lulediellit. Përziejni me spatul dhe përhapini në një shtresë uniforme në tavë.

2. Vendoseni tavën në furrë për 10 minuta në 180oC.

3. Në një tenxhere të vogël shtoni mjaltin dhe gjalpin e prerë në copa dhe trazojini në zjarr mesatar derisa gjalpi të shkrijë plotësisht.

4. Merrni një enë të thellë dhe aty shtoni rrushin e thatë, boronicat, përmbajtjen e tavës që keni nxjerrë nga furra dhe derdhni mbi to shurupin e mjaltit sa është ende i ngrohtë. Trazojini mirë me spatul derisa masa të kombinohet mirë.

5. Merrni një tavë katrore 20×20 cm dhe shtrojeni me letër pjekjeje. Në të shtoni masën e përgatitur dhe shtypeni mirë me fundin e një gote ose me dicka tjetër me sipërfaqe të sheshtë. Duhet ta presoni sa më mirë në tavë që të jetë sheshuar plotësisht nqs doni që të mos ju thërrmohet masa kur të tentoni ta prisni me thikë.

6. Vendoseni tavën në furrë për rreth 12-15 minuta në temperaturë 180oC. Nxirreni nga furra, lëreni të ftohet dhe pasi të jetë ftohur lëreni në frigorifer për disa orë.

7. Nxirreni nga frigoriferi dhe prisni në madhësinë e dëshiruar granola bars me një thikë shumë të mprehtë.

Kroketa Patatesh

Përbërësit:

  • 750 gr patate të ziera
  • 20 gr parmigiano
  • 1 vezë
  • 1 lugë gjelle nenexhik
  • 1 lugë çaji kripë
  • 50 gr miell
  • 2 vezë të rrahura
  • 100 gr galetë
  • Vaj për skuqjen

Përgatitja:

1. Zieni patatet, qërojini dhe shtypini me pirun. Kalojini në një enë të thellë. Rrihni vezën lehtë me pirun dhe shtojeni tek patatet e shtypura. Shtoni parmigiano-n, nenexhikun dhe kripën. Trazoni mirë me lugë druri derisa masa të lidhet dhe të bëhet e ngjeshur dhe e njëtrajtshme.

2. Vendosni në zjarr një tenxhere mesatare të mbushur 1/3 me vaj për skuqje. Ndërkohë që vaji nxehet, përgatisni tre enë ku keni përkatësisht miellin, dy vezët e rrahura dhe galetën në secilën prej tyre.

3. Ndajeni brumin e kroketave në toptha të vegjël duke e punuar me dorë dhe secilin nga topthat mbulojeni me miell, kalojeni në vezë dhe në një shtresë galete. Vëreni të skuqet në vajin e nxehur derisa të ketë marrë ngjyrë të kuqerremtë nga të gjitha anët.

4. Përsëriteni këtë proces me cdo topth brumi dhe në fund vërini kroketat e skuqura në një letër thithëse që të largojë vajin e tepërt.

Kompekaj

Përbërësit:

  • 10 vezë të freskëta (temperaturë ambienti)
  • 185 gr sheqer
  • 200 gr miell
  • 150 gr arra të grira
  • 30 gr kakao
  • 50 gr gjalp i shkrirë
  • 2 petë sfoliat
  • 50 gr reçel qershije (sipas dëshirës)
  • 1 majë gishtash sodë buke
  • ½ lugë çaji lëng limoni
  • 1 majë gishtash kripë
  • 1 e verdhë veze
Për shërbetin:
  • 1 litër ujë
  • 800 gr sheqer
  • 1 fetë limon
  • 1 shkop kanellë

Përgatitja:

1. Ndani veç të bardhat e vezëve nga të verdhat duke i vendosur në dy enë të thella. Merrni enën ku keni të verdhat e vezëve dhe rrihini me mikser dore derisa të verdhat të marrin ngjyrë të çelët.

2. Shtoni pak nga pak sheqerin dhe vazhdoni të miksoni. Në fund duhet të keni një masë kremoze dhe sheqeri të jetë homogjenizuar plotësisht.

3. Merrni një enë të thellë dhe aty shtoni miellin pasi ta keni situr, kakaon, sodën dhe arrat e grira. Trazojini mirë me lugë druri dhe shtojeni përmbajtjen e kësaj ene tek të verdhat e rrahura të vezëve.

4. Trazoni mirë me lugë druri derisa t’ju formohet një masë e trashë e kombinuar mirë dhe lëreni mënjanë.

5. Merrni enën me të verdhat e vezëve dhe shtoni kripën dhe lëngun e limonit dhe me mikser dore rrihini derisa t’ju formohet një marengë e fryrë dhe e qëndrueshme.

6. Shtojini të bardhat e rrahura në enën ku keni përbërësit e tjerë të kombinuar dhe me një lugë druri paloseni me kujdes masën e brumit mbi marengën me lëvizje njëdrejtimore nga poshtë lart duke treguar shumë kujdes të mos i ulni volumin marengës. Vazhdoni derisa marenga dhe brumi të bashkohen në një masë të vetme të fryrë.

7. Ndizni furrën ne 170oC. Me një furçë lyeni me gjalpin e shkrirë një tavë drejtkëndore. Merrni petën sfoliat dhe sheshojeni pak me pec. Shtrojeni në tavë petën në mënyrë që të mbulojë dhe këndet e tavës.

8. Përhapni me lugë reçelin mbi petën sfoliat dhe mbi reçel derdhni masën e brumit.

9. Merrni petën tjetër sfoliat, hollojeni pak me pec dhe shtrojeni me shumë kujdes mbi tavë. Kini kujdes të mos ju fundoset peta mbi brumë, pasi kjo do të pengojë që ëmbëlsira të fryhet.

10. Pritini me thikë cepat e dalë të petës. Rrihni të verdhën e vezës dhe lyejeni sipërfaqen e petës me të me një furçë.

11. Piqeni për rreth 35-40 minuta derisa kunji të dalë i pastër nga qendra e kekut.

12. Prisni që kompekaji të ftohet dhe përgatisni shërbetin që duhet të hidhet i nxehtë në kekun e ftohur.

13. Në një tenxhere shtoni përbërësit për shërbetin, trazoni herë pas here dhe lëreni të valojë për rreth gjysëm orë . Derdheni gjysmën e  shërbetit të nxehtë mbi ëmbëlsirë duke filluar nga cepat dhe duke u drejtuar drejt qendrës.

14. Lëreni ta thithë shërbetin dhe pastaj derdhni gjysmën e mbetur të shërbetit. Lëreni për disa orë para se ta konsumoni.